ریاض اور جنوبی ریجن کی جانب داغے جانے والے تین حوثی میزائل تباہ

سعودی عرب کے فضائی دفاعی نظام نے آج صبح دارالحکومت ریاض کی جانب داغے جانے والے ایک حوثی کروز اور ایک بیلسٹک میزائل کو کامیابی سے تباہ کر دیا، جبکہ جنوبی ریجن میں بھی ایک بیلسٹک میزائل کو فضا ہی میں مار گرایا گیا۔ یمن میں آئینی حکومت کی بحالی کے لیے قائم عرب اتحاد کے ترجمان میجر جنرل ترکی المالکی کے مطابق سعودی سول ڈیفنس نے ریاض، ابہا اور خمیس مشیط میں فوری طور پر جاری کیا گیا الرٹ بعد میں واپس لے لیا۔ ایرانی حمایت یافتہ حوثی ملیشیا کی جانب سے مدینہ ریجن میں ایسٹ ویسٹ پائپ لائن کو بھی نشانہ بنانے کی کوشش کی گئی، جہاں محدود آگ پر بغیر کسی جانی یا مالی نقصان کے قابو پا لیا گیا۔ ان حملوں کے جواب میں عرب اتحاد نے یمن میں حوثی ملیشیا کی بیلسٹک میزائل تیار کرنے والی تین اہم تنصیبات، جن میں کیمیکل پلانٹ اور الیکٹرانکس ورکشاپ شامل ہیں، کو فضائی کارروائی میں مکمل طور پر تباہ کر دیا ہے۔