یوٹیوبر رجب بٹ پر مبینہ وکلا کا حملہ، اہلیہ ایمان رجب کا انصاف کا مطالبہ

کراچی: پاکستان کے معروف یوٹیوبر رجب بٹ کے ساتھ کراچی میں پیش آنے والے افسوسناک واقعے کے بعد ان کی اہلیہ ایمان رجب کا ردعمل سامنے آ گیا ہے۔ رجب بٹ پر کراچی کی ایک عدالت میں پیشی کے دوران وکلا کے ایک گروپ نے مبینہ طور پر حملہ کیا، جس کے نتیجے میں وہ زخمی ہو گئے۔

واقعے کے بعد ایمان رجب نے انسٹاگرام پر مختصر بیان جاری کرتے ہوئے کہا کہ انصاف مانگنا انتشار نہیں، ہم قانون اور آئین کے تحت جوابدہی کا مطالبہ کرتے ہیں۔ ان کا کہنا تھا کہ رجب بٹ کے لیے انصاف اور پاکستان کے قانون کے احترام کی اشد ضرورت ہے۔

رپورٹس کے مطابق رجب بٹ عبوری ضمانت کی مدت ختم ہونے کے سلسلے میں عدالت میں پیش ہوئے تھے، یہ مقدمہ وکیل ریاض سولنگی کی جانب سے دائر کیا گیا تھا۔ سوشل میڈیا پر سامنے آنے والی ویڈیوز میں رجب بٹ کے منہ اور جبڑے پر خون کے نشانات واضح دیکھے جا سکتے ہیں۔

رجب بٹ کے وکیل میاں علی اشفاق نے واقعے کی شدید مذمت کرتے ہوئے کہا کہ کراچی سٹی کورٹ کے احاطے میں کچھ وکلا نے ان کے مؤکل پر مبینہ طور پر بے رحمی سے تشدد کیا۔ ان کا کہنا تھا کہ متعدد بار روکنے کی درخواست کے باوجود حملہ جاری رکھا گیا، جو وکلا کی غیر پیشہ ورانہ حرکت ہے۔

تاہم، واقعے پر تاحال رجب بٹ کی جانب سے کوئی باضابطہ بیان سامنے نہیں آ سکا۔