شارجہ بک فیئر میں پاکستان پویلین کا افتتاح، سفیر شفقت علی خان کی شرکت

متحدہ عرب امارات میں جاری 45ویں شارجہ انٹرنیشنل بک فیئر میں پاکستان کے سفیر شفقت علی خان نے باضابطہ طور پر پاکستان پویلین کا افتتاح کر دیا ہے۔

ایکسپو سینٹر شارجہ میں منعقدہ پروقار تقریب میں نامور اشاعتی اداروں، ادبی شخصیات اور تاجروں نے شرکت کی۔ پاکستانی پویلین میں اردو اور انگریزی زبانوں میں تاریخ، ثقافت، شاعری، ناول، بچوں کے ادب اور تحقیق پر مبنی نادر کتابیں نمائش کے لیے رکھی گئی ہیں۔ افتتاحی تقریب میں بک کارنر جہلم کے ڈائریکٹر گگن شاہد، فیروز سنز کے ڈائریکٹر دانیال سلام اور اردو بکس ورلڈ کے شریک بانی سرمد خان سمیت دیگر شخصیات موجود تھیں۔

سفیرِ پاکستان نے قدرت اللہ کمپنی، ضیاء القرآن پبلی کیشنز اور پیراماؤنٹ بکس سمیت مختلف اسٹالز کا دورہ کیا اور شارجہ کو عالمی علمی و ثقافتی مرکز قرار دیا۔ اپنے دورے کے دوران انہوں نے شارجہ بک اتھارٹی کے سربراہ احمد بن رکاض العامری سے بھی ملاقات کی، جس میں دوطرفہ ادبی و ثقافتی تعاون کے فروغ اور اردو کتب کی دستیابی پر تبادلہ خیال کیا گیا۔ انہوں نے محی الدین ابن عربی فاؤنڈیشن کے اسٹال کا بھی دورہ کر کے اسلامی علمی ورثے کے تحفظ اور شاہ ولی اللہ کی تصانیف کی اشاعت کو سراہا۔ پاکستانی سفیر نے امارات میں مقیم پاکستانیوں سے خاندان کے ساتھ کتاب میلے کا دورہ کرنے کی اپیل کی، جو 15 نومبر تک جاری رہے گا۔