علیزے شاہ نوجوان اداکارہ عینا آصف کے حق میں بول پڑیں

کراچی: پاکستانی ڈرامہ انڈسٹری کی ابھرتی ہوئی اسٹار عینا آصف نے حال ہی میں ایک نجی ٹی وی کے پروگرام (عمران اشرف کے شو) میں شرکت کے دوران سیٹ پر سینیئر اداکاروں کے نامناسب رویے کے بارے میں سنسنی خیز انکشافات کیے ہیں۔ عینا آصف کا کہنا تھا کہ بعض اوقات سینیئر اداکار نئے آنے والے فنکاروں کو نہ صرف نظر انداز کرتے ہیں بلکہ ان کی معمولی غلطیوں پر طنز بھی کرتے ہیں۔ انہوں نے بتایا کہ اہم مناظر کی عکس بندی کے دوران سینیئرز اکثر غیر ضروری گفتگو یا مذاق شروع کر دیتے ہیں جس سے جونیئر اداکاروں کی توجہ متاثر ہوتی ہے۔

عینا آصف کے اس بیان کے بعد معروف اداکارہ علیزے شاہ ان کی حمایت میں کھل کر سامنے آئی ہیں۔ علیزے شاہ نے انسٹاگرام پر عینا کی ویڈیو شیئر کرتے ہوئے کہا کہ “بڑے اداکار کبھی کبھار سیٹ پر آپ کی قدر نہیں کرتے یا آپ کو نیچا دکھانے کی کوشش کرتے ہیں۔” علیزے نے عینا آصف کو اپنی نسل کی بہترین اور ‘جذباتی طور پر ذہین’ (Emotionally Intelligent) اداکارہ قرار دیتے ہوئے کہا کہ یہ تجربہ اکثر ان کم عمر لڑکیوں کے ساتھ ہوتا ہے جن کا کوئی شوبز بیک گراؤنڈ نہیں ہوتا۔

علیزے شاہ نے عینا آصف کی جرأت اور ایمانداری کو سراہتے ہوئے انہیں اپنی مکمل حمایت کا یقین دلایا۔ ان کا کہنا تھا کہ نوجوان فنکاروں کے لیے یہ ایک مثبت پیغام ہے کہ وہ اپنے حقوق کے لیے آواز اٹھائیں اور سینیئرز کے منفی رویوں پر خاموش نہ رہیں۔ اس بحث نے سوشل میڈیا پر ایک نئی بحث چھیڑ دی ہے جہاں مداح نئے ٹیلنٹ کی حوصلہ افزائی اور سیٹ پر پیشہ ورانہ اخلاقیات کی پاسداری کا مطالبہ کر رہے ہیں۔