علیزہ شاہ کی تنازعات کو ہائی لائٹ کر کے توجہ حاصل کرنے کے الزام کی تردید

کراچی: معروف اداکارہ علیزے شاہ نے انسٹاگرام پر ایک ویڈیو کے ذریعے متنازع الزامات کی تردید کی اور اپنے آنے والے نئے پروجیکٹس سے مداحوں کو آگاہ کیا۔

علیزے شاہ نے کہا کہ انہیں معلوم ہے کہ لوگ سوچ رہے ہوں گے کہ وہ توجہ حاصل کرنے کے لیے یہ ویڈیو پوسٹ کر رہی ہیں، لیکن مقصد مداحوں کو اپنے ڈراموں کے اسکرپٹس دکھانا اور اپنے کام کی مصروفیات واضح کرنا تھا۔

اداکارہ نے واضح کیا کہ گزشتہ پانچ برسوں میں ان کے ساتھ جو کچھ ہوا، اس کے بعد انہیں وقفے کی ضرورت تھی۔ انہوں نے بتایا کہ ان کے مینیجر نے انہیں مشورہ دیا کہ کچھ معاملات پر بات نہ کریں تاکہ ان کی ساکھ متاثر نہ ہو، لیکن حقیقت یہ ہے کہ یہ سب کچھ جان بوجھ کر کیا جا رہا تھا۔

علیزے شاہ نے کہا کہ انہوں نے یاسر نواز کے خلاف آواز اس لیے اٹھائی کہ مسلسل ان کا نام لیا جا رہا تھا، اور شازیہ منظور کے خلاف بات اس لیے کی کیونکہ ان کی جانب سے بارہا انہیں نیچا دکھانے کی کوشش کی گئی۔ انہوں نے زور دیا کہ یہ سب حادثاتی نہیں بلکہ جان بوجھ کر کیا گیا۔

اداکارہ نے مداحوں کو یقین دلایا کہ وہ صرف حقائق کھل کر بیان کر رہی ہیں اور ان کے پاس متعدد پراجیکٹس لائن میں ہیں، اس لیے توجہ حاصل کرنے کا کوئی مقصد نہیں۔

ویڈیو کے بعد علیزے شاہ کو مداحوں کی جانب سے بھرپور پذیرائی اور محبت ملی، جنہوں نے ان کے سچ بولنے اور حقائق ظاہر کرنے کے حوصلے کو سراہا۔