ٹک ٹاکر علینہ عامر نے اپنی نازیبا ویڈیوز کو ڈیپ فیک قرار دیدیا، کارروائی کا مطالبہ

مشہور ٹک ٹاکر علینہ عامر نے سوشل میڈیا پر وائرل ہونے والی نازیبا ویڈیو کو جعلی اور ڈیپ فیک قرار دیتے ہوئے شدید ردعمل دیا ہے اور وزیراعلیٰ پنجاب سے اس معاملے پر فوری کارروائی کا مطالبہ کیا ہے۔

علینہ عامر نے اس حوالے سے ایک وضاحتی ویڈیو جاری کی جس میں ان کا کہنا تھا کہ وہ گزشتہ ایک ہفتے سے خاموشی اختیار کیے ہوئے تھیں، تاہم جب سوشل میڈیا پر مسلسل یہ دعوے سامنے آئے کہ ان کی ویڈیو لیک ہو چکی ہے تو انہیں بولنا پڑا۔

انہوں نے کہا کہ کچھ لوگ کسی کو بدنام کرنے کے لیے بغیر تحقیق کے جھوٹی معلومات پھیلا رہے ہیں اور یہ جانے بغیر مواد شیئر کر رہے ہیں کہ ویڈیو حقیقی ہے یا ڈیپ فیک۔

ٹک ٹاکر نے سی سی ڈی پنجاب کی کارکردگی کو سراہتے ہوئے اس کے سربراہ سہیل ظفر چھٹہ سے اپیل کی کہ اے آئی کے ذریعے جعلی ویڈیوز بنانے والوں کو سخت سے سخت سزا دی جائے۔ علینہ عامر کا کہنا تھا کہ کسی خاتون کی جعلی ویڈیوز بنا کر اسے بدنام کرنا سنگین ہراسانی کے زمرے میں آتا ہے۔