عید پر علی ظفر کا دھوتی لُک، صارفین کی تنقید

لاہور: پاکستانی میوزک انڈسٹری کے نامور گلوکار اور اداکار علی ظفر عید الفطر کے موقع پر اپنے منفرد لباس کے انتخاب کی وجہ سے سوشل میڈیا صارفین کے نشانے پر آ گئے ہیں۔ انسٹاگرام پر اپنے 60 لاکھ سے زائد فالوورز کے ساتھ عید کی خوشیاں بانٹتے ہوئے علی ظفر نے ایک مختصر ویڈیو شیئر کی، جس میں وہ اپنے گھر کے باغیچے میں پودوں کو پانی دیتے نظر آ رہے ہیں۔

ویڈیو کے کیپشن میں علی ظفر نے مداحوں کو عید کی مبارکباد دیتے ہوئے ایک مثبت پیغام بھی شیئر کیا کہ “پودوں کو پانی دینا مت بھولیں”۔ تاہم، صارفین کی توجہ ان کے پیغام کے بجائے ان کے پہناوے پر مرکوز ہو گئی۔ ویڈیو میں علی ظفر نے گلابی اور پیچ رنگ کی قمیض کے ساتھ سکرٹ نما ‘لاچا’ یا ‘دھوتی’ طرز کا لباس پہن رکھا تھا، جو روایتی مردانہ عید کے ملبوسات سے کافی مختلف تھا۔

جیسے ہی یہ ویڈیو منظرِ عام پر آئی، سوشل میڈیا پر بحث چھڑ گئی۔ جہاں کچھ مداحوں نے ان کے اس تجرباتی فیشن کو پسند کیا، وہی بڑی تعداد میں صارفین نے اسے تنقید کا نشانہ بناتے ہوئے اسے ‘غیر مناسب’ قرار دیا۔ صارفین کا کہنا ہے کہ عید جیسے تہوار پر ایسے ملبوسات مشرقی روایات کے منافی ہیں۔ واضح رہے کہ علی ظفر اکثر و بیشتر اپنے لباس اور اسٹائل کے ساتھ تجربات کرتے رہتے ہیں، جو کبھی سراہے جاتے ہیں اور کبھی بحث کا موضوع بن جاتے ہیں۔