’دوسروں کو خوش رہنے دو‘ علی ظفر اداکارہ کترینہ کے بڑھتے وزن پر ہونیوالی تنقید پر بول پڑے

پاکستان کے نامور گلوکار و اداکار علی ظفر بالی وڈ اداکارہ کترینہ کیف کے بڑھتے وزن پر ہونے والی شدید تنقید پر ان کے حق میں کھل کر سامنے آ گئے ہیں۔ واضح رہے کہ کترینہ کیف بیٹے کی پیدائش کے بعد سے فلمی دنیا سے دور ہیں اور ان کے وزن میں بھی اضافہ ہوا ہے۔ حال ہی میں کترینہ کو شوہر وکی کوشل کے ساتھ ایک تقریب میں سبز رنگ کے لباس میں دیکھا گیا، جہاں ان کے فیشن کے بجائے ان کے بڑھتے وزن پر سوشل میڈیا پر ناقدین نے شدید تبصرے کرنا شروع کر دیے۔

سوشل میڈیا پر ہونے والی اس باڈی شیمنگ پر علی ظفر نے کترینہ کیف کا دفاع کرتے ہوئے ناقدین کو کرارا جواب دیا۔ انہوں نے کہا کہ ایک مرد ہونے کی حیثیت سے ہمیں اپنے اندر جھانک کر اصلاح کرنے کی ضرورت ہے، کیونکہ مردوں نے عورت کے جسم اور ظاہری خوبصورتی سے متعلق غلط معیارات بنا رکھے ہیں۔ علی ظفر کا مزید کہنا تھا کہ ہمیں علم نہیں ہوتا کہ کوئی شخص اپنی ذاتی زندگی میں کن مراحل اور تبدیلیوں سے گزر رہا ہے، اس لیے لوگوں کے ساتھ مہربانی سے پیش آنا چاہیے۔ انہوں نے مشورہ دیا کہ یہ زندگی مختصر ہے، اس لیے دوسروں کو ان کی زندگی میں خوش رہنے دیں اور خود بھی اپنی زندگی جیئیں۔