فرینڈز آف سیونٹینز تھیٹر ڈرامہ الحمرا میں پیش، پہلے ہی شو میں ہال ہاؤس فل

لاہور کے ثقافتی مرکز الحمرا ہال میں جدید و معیاری ڈرامہ ’فرینڈز آف سیونٹینز‘ (Friends of 70s) پیش کر دیا گیا ہے، جس کے پہلے ہی شو میں ہال ہاؤس فل رہا اور شائقین کے قہقہوں سے ہال گونج اٹھا۔

اس فیملی تھیٹر ڈرامے کا سکرپٹ سید انجم نے تحریر کیا ہے جبکہ ڈرامے کی ہدایات معروف سینیئر اداکار وسیم عباس نے دی ہیں۔ ڈرامے کی نمایاں خصوصیات میں 1970ء کی دہائی کا معاشرتی ماحول، مضبوط کہانی اور معیاری مکالمے شامل ہیں۔ ڈرامے کی کاسٹ میں ہنی البیلا، قیصر پیا، اشرف خان، مہر چوہدری، ایمان نور، عثمان راج، شیزہ بٹ اور احمد مغل جیسے نامور فنکار اپنے فن کے جوہر دکھا رہے ہیں۔

صوبائی وزیر اطلاعات و ثقافت پنجاب عظمیٰ بخاری نے ڈرامے کی نمائش پر گفتگو کرتے ہوئے کہا کہ وزیراعلیٰ پنجاب کے وژن کے مطابق صوبے میں معیاری، شائستہ اور بامقصد فیملی تھیٹر کا احیاء حکومت کی اولین ترجیح ہے۔ انہوں نے کہا کہ طویل عرصے بعد لاہوریوں کو اپنے اہل خانہ کے ساتھ بہترین تفریح میسر آئی ہے، جس کا مقصد مثبت پیغام رسانی اور نئی نسل کو ماضی کی خوبصورت اقدار سے روشناس کرانا ہے۔ یہ ڈرامہ 14 اگست تک الحمرا ہال میں جاری رہے گا۔