اکشے کمار کی بھارت میں نسل پرستی کے واقعات کی سخت مذمت

نئی دہلی: بالی ووڈ کے نامور اداکار اکشے کمار نے ایک ٹی وی شو کے دوران شمال مشرقی بھارت سے تعلق رکھنے والے افراد کے خلاف نسل پرستانہ جملوں اور امتیازی سلوک کی سخت الفاظ میں مذمت کی ہے۔ یہ معاملہ اس وقت سامنے آیا جب شو کے ایک شریک امیدوار (Contestant) نے اپنا دکھ بھرا تجربہ سناتے ہوئے بتایا کہ اسے ممبئی میں چہرے کے خدوخال کی وجہ سے “چین جاؤ” جیسے طعنے دیے گئے اور کووڈ-19 پھیلانے کا الزام بھی لگایا گیا۔

اس پر اکشے کمار نے دوٹوک موقف اپناتے ہوئے کہا کہ شمال مشرقی بھارت کے لوگ بھی اتنے ہی بھارتی ہیں جتنے ہم سب، اور یہ امتیاز کسی صورت قبول نہیں۔ معاملے کی سنگینی کو ثابت کرنے کے لیے اکشے نے اپنے میک اپ آرٹسٹ کو بھی اسٹیج پر بلایا، جس نے انکشاف کیا کہ اسے اکثر ‘چائنیز’، ‘چنکی’ اور ‘مومو’ جیسے توہین آمیز القابات سے پکارا جاتا ہے۔

اپنے عملے کے رکن کی آپ بیتی سن کر اکشے کمار جذباتی نظر آئے اور انہوں نے عوامی سطح پر اپیل کی کہ اس رویے کو فی الفور بدلا جائے۔ ان کا کہنا تھا کہ رنگ و نسل اور شکل و صورت کی بنیاد پر اپنے ہی ہم وطنوں کو نیچا دکھانا بند کیا جائے۔