آزاد کشمیر انتخابات: جمعیت اہلحدیث کے امیدوار مسلم لیگ (ن) کے حق میں دستبردار

آزاد جموں و کشمیر قانون ساز اسمبلی کے عام انتخابات 2026 کے پیشِ نظر خطے میں سیاسی و انتخابی سرگرمیاں عروج پر پہنچ گئی ہیں۔ اہم سیاسی پیش رفت کے تحت مرکزی جمعیت اہلحدیث آزاد جموں و کشمیر نے اپنے 5 امیدواروں کو مسلم لیگ (ن) کے نامزد کردہ امیدواروں کے حق میں باضابطہ طور پر دستبردار کرنے کا اعلان کر دیا ہے۔

وزیراعظم پاکستان کے مشیر رانا ثناء اللہ کی موجودگی میں مرکزی جمعیت اہلحدیث آزاد جموں و کشمیر کے ناظمِ اعلیٰ محمد امین بٹ نے حلقہ ایل اے-29 مظفرآباد 3 اور حلقہ ایل اے-26 نیلم 1 سے اپنے امیدواروں کو دستبردار کرانے کا اعلان کیا۔ اس کے علاوہ جماعت کے مزید تین دیگر حلقوں سے بھی امیدوار مسلم لیگ (ن) کے حامی بن کر انتخاب سے دستبردار ہو گئے ہیں۔

اس سیاسی پیش رفت پر مسلم لیگ (ن) آزاد کشمیر کے صدر شاہ غلام قادر نے مرکزی جمعیت اہلحدیث کے اعلیٰ سطح کے وفد سے ملاقات کی، جس میں آزاد کشمیر انتخابات 2026 میں ن لیگ کے امیدواروں کو بھاری اکثریت سے کامیاب کرانے کے لیے مشترکہ انتخابی مہم چلانے اور باہمی حکمتِ عملی پر اتفاق کیا گیا۔