سینئر اداکار سیٹ پر نئے یا چھوٹے اداکاروں کی معمولی باتوں پر بھی خامیاں نکالتے ہیں: عینا آصف

کراچی: پاکستانی ڈرامہ انڈسٹری کی نامور اور کم عمر اداکارہ عینا آصف نے شوبز انڈسٹری کے تاریک پہلوؤں پر روشنی ڈالتے ہوئے سینیئر اداکاروں کے غیر پیشہ ورانہ رویے سے متعلق اہم انکشافات کیے ہیں۔ ایک نجی ٹی وی چینل کے پروگرام میں گفتگو کرتے ہوئے عینا آصف نے بتایا کہ سیٹ پر اکثر ‘بڑے اسٹارز’ نئے آنے والے اداکاروں کی حوصلہ شکنی کرنے کے لیے مختلف حربے استعمال کرتے ہیں۔

اداکارہ کا کہنا تھا کہ سینیئر اداکار اکثر چھوٹی چھوٹی باتوں پر جونیئر اداکاروں کو ٹوکتے ہیں اور ان کے کام میں بلاوجہ خامیاں نکالتے ہیں۔ عینا نے مزید انکشاف کیا کہ “کبھی کبھی ایسا ہوتا ہے کہ اگر ہم کوئی بات کر دیں تو وہ ہمیں اس طرح حقارت سے دیکھتے ہیں جیسے ہم نے کوئی بہت ہی احمقانہ بات کر دی ہو، حالانکہ وہ کوئی اتنی بڑی بات نہیں ہوتی۔”

عینا آصف نے سیٹ کے ماحول پر بات کرتے ہوئے کہا کہ بعض اوقات جب کوئی اہم سین عکسبند ہو رہا ہو، تو سینیئر اداکار جان بوجھ کر باتیں شروع کر دیتے ہیں یا ایسی حرکات کرتے ہیں جس سے جونیئر اداکار کی توجہ بٹ جائے اور وہ غیر آرام دہ (Uncomfortable) محسوس کرے۔ اداکارہ نے دکھ بھرے لہجے میں کہا کہ پہلے انہیں ان باتوں پر بہت غصہ آتا تھا، لیکن اب یہ ہر سیٹ کا معمول بن چکا ہے، اس لیے اب انہوں نے اسے نظر انداز کرنا سیکھ لیا ہے۔