آئمہ بیگ دروازے سے ٹکرا کر زخمی ہو گئیں، چہرہ متاثر

لاہور: پاکستان کی معروف گلوکارہ آئمہ بیگ حادثاتی طور پر دروازے سے ٹکرا کر چہرے اور آنکھ کے گرد شدید زخمی ہو گئی ہیں، جس کے بعد انہوں نے سوشل میڈیا پر اپنی تصاویر شیئر کر کے مداحوں کو اپنی صحت کے بارے میں آگاہ کیا ہے۔

آئمہ بیگ نے انسٹاگرام اسٹوریز کے ذریعے اپنے چہرے کی تصویر شیئر کی جس میں آنکھ کے اطراف چوٹ اور نیل کے نمایاں نشانات دیکھے جا سکتے ہیں۔ گلوکارہ نے بتایا کہ وہ پہلے ہی فلو، شدید بخار اور گلے کی تکلیف کا شکار تھیں کہ اسی دوران ان کا چہرہ اچانک زور سے دروازے سے جا ٹکرایا جس سے انہیں شدید تکلیف کا سامنا کرنا پڑا۔

بعد ازاں صبح ساڑھے چار بجے کے قریب جاری کردہ ایک ویڈیو پیغام میں آئمہ بیگ نے مداحوں کو اپنی تازہ ترین صورتحال سے آگاہ کیا۔ انہوں نے بتایا کہ چوٹ کے فوری بعد وہ متاثرہ حصے پر مسلسل آئسنگ (برف کی ٹکور) کر رہی ہیں تاکہ سوجن اور نیل کم ہو سکے۔ ان کا کہنا تھا کہ انہیں اس سے قبل زندگی میں کبھی اتنا بڑا اور گہرا نیل نہیں پڑا۔

گلوکارہ کی تصاویر سامنے آنے کے بعد سوشل میڈیا پر ان کے مداحوں اور شوبز شخصیات کی جانب سے ان کی جلد صحتیابی کے لیے نیک خواہشات اور دعاؤں کا سلسلہ جاری ہے۔