کوانٹم ویلی پاکستان لانچنگ جدید ٹیکنالوجی کی صلاحیت بڑھانے کی جانب اہم قدم ہے: احسن اقبال

وفاقی وزیر برائے منصوبہ بندی، ترقی و اصلاحات احسن اقبال نے ‘کوانٹم ویلی پاکستان’ (Quantum Valley Pakistan) کی باضابطہ لانچنگ کو ملک کے لیے ایک انتہائی قابلِ فخر لمحہ اور جدید ٹیکنالوجی میں پاکستان کی قومی صلاحیت بڑھانے کی جانب اہم پیشرفت قرار دیا ہے۔ تقریب سے خطاط کرتے ہوئے وفاقی وزیر نے کہا کہ اس منصوبے کا آغاز پاکستان کی معاشی اور تکنیکی ترقی کی سمت میں ایک نئے سفر کی شروعات ہے جو ملک کو عالمی ہائی ٹیک تناظر میں یکسر آگے لے جائے گا۔

احسن اقبال نے کوانٹم ویلی پاکستان اور عالمی سطح پر معروف ‘کیمبرج انوویشن سینٹر’ (Cambridge Innovation Center) کے درمیان طے پانے والے اہم معاہدے کا خیرمقدم کیا۔ انہوں نے واضح کیا کہ اس تاریخی اقدام سے پاکستانی نوجوانوں کو اعلیٰ ترین جدید ٹیکنالوجی کی تربیت اور وسائل میسر آئیں گے، جس سے ملک میں نئے اسٹارٹ اپس، اختراعات اور ہائی ٹیک کاروبار کی وسیع تر راہ ہموار ہوگی اور ٹیکنالوجی کے شعبے میں نچلی سطح پر بھی صلاحیتیں پیدا ہوں گی۔

وفاقی وزیر نے خطے کی مجموعی صورتحال پر گفتگو کرتے ہوئے کہا کہ معرکہِ حق میں عظیم فتح سے پاکستان کو دنیا میں ایک نئی اور مضبوط پہچان ملی ہے، جبکہ پاکستان نے ایران اور امریکہ کے درمیان کشیدگی کو ختم کر کے جنگ بندی کرانے میں بھی انتہائی فعال اور ذمہ دارانہ سفارتی کردار ادا کیا ہے۔ انہوں نے اس بات پر زور دیا کہ دفاعی اور سفارتی محاذ پر پائیدار کامرانیوں کے لیے معیشت کا مستحکم ہونا ناگزیر ہے، لہٰذا اس وقت تمام تر توجہ جدید ٹیکنالوجی کے فروغ، نوجوانوں کی صلاحیتوں کو نکھارنے اور ہائی ٹیک انڈسٹری کو مضبوط بنانے پر مرکوز کرنا وقت کی سب سے بڑی ضرورت ہے۔