ڈکیت کوسٹر میں آئے موبائل چھین کر لے گئے، عادی عدیل امجد

معروف اداکار اور میزبان عادی عدیل امجد نے انکشاف کیا ہے کہ وہ اپنی زندگی میں صرف ایک بار ڈکیتی کی واردات کا شکار ہوئے ہیں، جب وہ کالج کے دور میں اپنے دوست کے گھر کے باہر موجود تھے۔ ایک نجی ٹی وی کے مزاحیہ شو میں شرکت کے دوران اس دلچسپ اور تلخ واقعے کا ذکر کرتے ہوئے عادی عدیل کا کہنا تھا کہ وہ اپنے دوست اسد کے گھر کے دروازے پر کھڑے تھے کہ اچانک ایک کوسٹر آ کر رکی اور اس میں سے اترنے والے شخص نے چیخ کر ان سے موبائل فون مانگنا شروع کر دیا۔

اداکار نے بتایا کہ وہ اس شخص کو اپنے دوست کا کوئی واقف کار سمجھے اور اس کے تلخ رویے پر دوست سے شکایت بھی کی، تاہم جب اس شخص نے انہیں ایک زور دار تھپڑ رسید کیا تو حقیقت کا اندازہ ہوا۔ اس کے بعد جب انہوں نے ڈکیت کو موبائل فون دیا تو وہ انہیں آئندہ فوراً فون دینے کی ہدایت کرتا ہوا واپس اسی کوسٹر میں بیٹھ کر فرار ہو گیا۔ عادی عدیل کا مزید کہنا تھا کہ جب وہ اس واقعے کی رپورٹ درج کروانے تھانے پہنچے اور پولیس اہلکاروں کو بتایا کہ ڈکیت کوسٹر میں آئے تھے، تو پولیس اہلکار بھی یہ اچھوتا طریقہ دیکھ کر حیران رہ گئے۔