پرواز میں ایک فضائی میزبان کو مکے مارنے، دوسرے کو کاٹنے پر سلمیٰ بلیئر گرفتار

معروف امریکی اداکارہ سلمیٰ بلیئر کو لاس اینجلس سے نیویارک جانے والی ڈیلٹا ایئر لائنز کی پرواز میں فضائی عملے پر مبینہ حملے کے الزام میں نیویارک کے جان ایف کینیڈی (JFK) انٹرنیشنل ایئرپورٹ پر پرواز کی لینڈنگ کے فوراً بعد گرفتار کر لیا گیا ہے۔ بین الاقوامی میڈیا کے مطابق واقعے کے نتیجے میں فلائٹ کریو کے 2 ارکان زخمی ہوئے جن میں سے ایک کو ہسپتال منتقل کرنا پڑا، جبکہ کوئنز کی عدالت میں 54 سالہ اداکارہ پر ہسپتال منتقلی کے دوران پولیس اہلکار اور نرس پر بھی حملے کے الزامات عائد کرتے ہوئے 20 ہزار ڈالر نقد یا 60 ہزار ڈالر کے بانڈز پر ضمانت کی شرط رکھی گئی ہے۔ ایف بی آئی (FBI) نے واقعے کی باضابطہ تحقیقات شروع کر دی ہیں جبکہ ایئرلائن انتظامیہ نے مسافروں اور عملے کی حفاظت پر زیرو ٹالرنس پالیسی کا اعادہ کیا ہے۔ دوسری جانب اداکارہ کے نمائندے کا کہنا ہے کہ دورانِ پرواز انہیں طبی ہنگامی صورتحال پیش آئی تھی، جس کے باعث یہ افسوسناک واقعہ پیش آیا۔