فلم فلاپ ہوسکتی ہے، عورت نہیں: اداکارہ میرا

پاکستان کی سینئر اور جانی مانی اداکارہ میرا نے اپنی نئی فلم ’سائیکو‘ کی باکس آفس پر ناکامی اور اس پر ہونے والی تنقید کا بھرپور اور دوٹوک انداز میں جواب دیا ہے۔ ان کا کہنا ہے کہ فلموں کی کامیابی یا ناکامی سے کہیں زیادہ انسان کا حوصلہ، خود اعتمادی اور ثابت قدمی اہمیت رکھتی ہے۔

اداکارہ میرا نے اپنے تصدیق شدہ انسٹاگرام اکاؤنٹ پر کچھ تصاویر کے ساتھ ناکامی، کامیابی اور مشکل وقت میں ساتھ چھوڑ جانے والوں کے حوالے سے اپنے خیالات اور مختلف پیغامات شیئر کیے ہیں۔ ایک پوسٹ میں انہوں نے کھل کر لکھا کہ لوگ انہیں اس لیے “فلاپ” قرار دیتے ہیں کیونکہ ان کی فلم باکس آفس پر 100 کروڑ روپے کا بزنس نہیں کر سکی۔ میرا نے خود کو ایک بہادر انسان قرار دیتے ہوئے کہا کہ فلم کی ریلیز کے بعد جب ان لوگوں کا رویہ بدلا جو مشکل وقت میں ان کا ساتھ چھوڑ گئے تھے، تب بھی وہ ہمت نہیں ہاری اور مسلسل آگے بڑھتی رہیں۔ انہوں نے ایک اور طاقتور پیغام میں دوٹوک انداز میں لکھا کہ ”فلم فلاپ ہوسکتی ہے، عورت نہیں۔“

اپنی ان سوشل میڈیا پوسٹس کے ذریعے اداکارہ میرا نے شوبز انڈسٹری میں صرف بڑی باکس آفس کمائی کو ہی کامیابی کا حتمی معیار سمجھنے کے اس فرسودہ رجحان پر بھی شدید سوالات اٹھائے ہیں۔ انہوں نے انکشاف کیا کہ فلم ’سائیکو‘ کی شوٹنگ کے دوران وہ شدید ڈپریشن اور ذہنی دباؤ کا بھی شکار رہی تھیں، تاہم وہ فلم کی تجارتی کارکردگی کو اپنی اصل شناخت بنانے کے حامی نہیں ہیں بلکہ اپنی ذاتی جدوجہد اور ہر کٹھن حالات میں ڈٹے رہنے کو اصل کامیابی سمجھتی ہیں۔

واضح رہے کہ اداکارہ میرا طویل عرصے سے پاکستانی فلم انڈسٹری سے وابستہ چلی آ رہی ہیں، اور اپنے کیریئر کے دوران مختلف ادوار میں پیشہ ورانہ اتار چڑھاؤ اور تنقید کا سامنا کرنے کے باوجود وہ شوبز انڈسٹری میں اپنی تخلیقی سرگرمیاں مسلسل جاری رکھے ہوئے ہیں۔