اداکارہ ہانیہ عامر کی شادی سے قبل ہی طلاق کی پیشگوئی

ایک نجی ٹی وی پروگرام میں ماہر نجومیوں کی جانب سے حیران کن پیش گوئی سامنے آئی ہے، جس میں دعویٰ کیا گیا ہے کہ معروف اداکارہ ہانیہ عامر کو سال 2026 میں طلاق کا سامنا کرنا پڑ سکتا ہے، حالانکہ اداکارہ کی تاحال شادی ہی نہیں ہوئی۔

ہانیہ عامر پاکستان کی مقبول ترین اداکاراؤں میں شمار ہوتی ہیں اور انسٹاگرام پر سب سے زیادہ فالو کی جانے والی پاکستانی اداکارہ ہیں۔ اس وقت وہ اے آر وائی ڈیجیٹل کے ہٹ ڈرامہ سیریل ’میری زندگی ہے تو‘ میں اپنی شاندار اداکاری کے باعث خوب پذیرائی حاصل کر رہی ہیں۔ مداح نہ صرف ان کے فن بلکہ سوشل میڈیا پر ان کی متحرک موجودگی کو بھی بے حد پسند کرتے ہیں، جبکہ ان کی ذاتی زندگی بھی ہمیشہ خبروں کی زینت بنی رہتی ہے۔

حالیہ دنوں میں ہانیہ عامر اپنے پرانے دوست اور گلوکار عاصم اظہر کے ساتھ تعلقات کے حوالے سے بھی سوشل میڈیا اور شوبز حلقوں میں زیرِ بحث رہیں۔

نجی ٹی وی چینل کے مارننگ شو ’رائز اینڈ شائن‘ میں میزبان ندا خان کے سوالات پر پروگرام میں شریک ماہر نجومیوں نے ہانیہ عامر کے پیدائشی زائچے اور فلکیاتی نقشے کا جائزہ لیتے ہوئے ان کے مستقبل سے متعلق مختلف پیش گوئیاں کیں، جن میں 2026 میں طلاق کا دعویٰ بھی شامل تھا، جس نے ناظرین کو حیرت میں مبتلا کر دیا۔

واضح رہے کہ اداکارہ کی جانب سے اس پیش گوئی پر تاحال کوئی ردِعمل سامنے نہیں آیا۔