اداکار ہمایوں اشرف موبائل اسنیچنگ کے دوران فائرنگ سے زخمی ہونے کا انکشاف

پاکستانی شوبز انڈسٹری کے معروف اداکار ہمایوں اشرف نے حال ہی میں اپنے ساتھ پیش آنے والے ایک خوفناک موبائل اسنیچنگ کے واقعے کی تفصیلات بیان کی ہیں، جس دوران ملزم نے ان پر فائرنگ بھی کی۔

ایک ٹی وی شو میں گفتگو کرتے ہوئے ہمایوں اشرف نے بتایا کہ واقعے سے چند دن قبل ہی انہوں نے ایک نیا اور مہنگا موبائل فون خریدا تھا۔ انہوں نے کہا کہ وہ ایک دوست کے ساتھ جا رہے تھے کہ اچانک ایک شخص نے ان سے موبائل فون چھیننے کی کوشش کی۔

اداکار کے مطابق ابتدا میں انہوں نے موبائل چور کے حوالے کرنے کا فیصلہ کیا، لیکن یہ سوچ کر کہ فون نیا ہے، انہوں نے ہاتھ پیچھے کر لیا۔ اسی دوران ملزم نے زبردستی موبائل چھینا، جس پر مزاحمت ہوئی۔

ہمایوں اشرف نے بتایا کہ کشمکش کے دوران ملزم نے قریب سے متعدد فائر کیے اور موقع سے فرار ہو گیا۔ انہوں نے کچھ فاصلے تک ملزم کا پیچھا بھی کیا اور ایک گاڑی کے پیچھے جا کر چھپ گئے، تاہم وہاں بھی ایک بار پھر فائرنگ کی گئی۔

اداکار کا کہنا تھا کہ کچھ دیر بعد ایک شخص نے ان کی خیریت دریافت کی تو ابتدا میں انہیں خود کو ٹھیک محسوس ہوا، لیکن جب انہوں نے اپنی ٹانگ کی طرف دیکھا تو معلوم ہوا کہ انہیں گولی لگ چکی ہے اور خون بہہ رہا ہے۔

ہمایوں اشرف کے اس انکشاف کے بعد شہری علاقوں میں بڑھتی ہوئی اسٹریٹ کرائم کی صورتحال پر ایک بار پھر تشویش کا اظہار کیا جا رہا ہے۔