پاکستان کی انڈر 15 اسکواش میں شاندار کامیابی، محمد سہیل عدنان عالمی چیمپئن بن گئے

پاکستان کی انڈر 15 اسکواش ٹیم نے ایک اور عالمی اعزاز حاصل کرتے ہوئے قومی پرچم بلند کر دیا۔
پاکستان کے نوجوان کھلاڑی محمد سہیل عدنان نے شاندار کارکردگی کا مظاہرہ کرتے ہوئے فائنل میں چین کے یوان شی کو اسٹریٹ سیٹس میں شکست دے کر ٹائٹل اپنے نام کر لیا۔

فائنل مقابلے میں محمد سہیل عدنان نے چینی حریف کو 11-7، 11-9 اور 11-7 سے زیر کرتے ہوئے اپنی برتری ثابت کی اور پاکستان کے لیے ایک اور عالمی اعزاز جیتا۔

واضح رہے کہ محمد سہیل عدنان اس سے قبل جنوبی کوریا میں منعقدہ 32ویں ایشین انڈر 13 جونیئر اسکواش چیمپئن شپ بھی جیت چکے ہیں۔
ایشین جونیئر اسکواش کے مقابلوں میں بھی سہیل عدنان نے شاندار کارکردگی کا تسلسل برقرار رکھا۔

کوارٹر فائنل میں پاکستانی کھلاڑی نے بھارت کے ابھاد سنگھ کو 11-3، 11-9 اور 11-4 سے عبرتناک شکست دے کر سیمی فائنل کے لیے کوالیفائی کیا۔

اسپورٹس حلقوں کا کہنا ہے کہ محمد سہیل عدنان کی یہ کامیابیاں نوجوان ٹیلنٹ ہنٹ پروگرام کے خوشگوار ثمرات ہیں، جو مستقبل میں پاکستان اسکواش کے روشن امکانات کی عکاسی کرتی ہیں۔