50 ویں چیف آف آرمی سٹاف پولو اینڈ ٹینٹ پیگنگ چیمپئن شپ پشاور کور نے جیت لی

پاک فوج کے شعبہ تعلقات عامہ (آئی ایس پی آر) کے مطابق 50ویں چیف آف آرمی اسٹاف پولو اینڈ ٹینٹ پیگنگ چیمپئن شپ 2025 کی اختتامی تقریب منعقد ہوئی، جس میں چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے بطور مہمانِ خصوصی شرکت کی۔

آئی ایس پی آر کے مطابق جناح پولو فیلڈز آمد پر کور کمانڈر لاہور اور چیئرمین پاکستان پولو فیڈریشن نے فیلڈ مارشل سید عاصم منیر کا استقبال کیا۔ تقریب میں وزیر داخلہ، چیف سیکرٹری پنجاب سمیت تماشائیوں کی بڑی تعداد نے شرکت کی۔

ترجمان پاک فوج کے مطابق چیمپئن شپ پاک فوج کی کھیلوں سے وابستہ روایات، پیشہ ورانہ مہارت اور نظم و ضبط کی بھرپور عکاسی کرتی ہے۔ چیمپئن شپ میں مجموعی طور پر آٹھ ٹیموں نے حصہ لیا، جن میں پشاور کور نے شاندار کارکردگی کا مظاہرہ کرتے ہوئے چیمپئن شپ اپنے نام کرلی، جبکہ گوجرانوالہ کور نے دوسری پوزیشن حاصل کی۔

اختتامی تقریب کے دوران مہمانِ خصوصی فیلڈ مارشل سید عاصم منیر نے فاتح اور شریک ٹیموں میں انعامات تقسیم کیے۔