سوشل میڈیا پر سمگل شدہ سامان فروخت کرنے والوں کیخلاف کارروائی کا فیصلہ

ذرائع کے مطابق یکم جنوری سے سوشل میڈیا پر نان کسٹم پیڈ اور سمگل شدہ سامان فروخت کرنے والوں کی مانیٹرنگ شروع کی جائے گی۔ سوشل میڈیا پر اسمگلڈ لاٹ کا مال بیچنے والوں کے خلاف مختلف ٹولز استعمال کرتے ہوئے ان کا ڈیٹا جمع کیا جائے گا۔

ذرائع کا کہنا ہے کہ سمگلڈ الیکٹرونکس، گھریلو آلات، جوتے، کپڑے، میک اپ کا سامان، ٹائر، گاڑیوں کے پرزہ جات، لیپ ٹاپ، کمپیوٹرز، فرنیچر، ڈرائی فروٹس اور دیگر اشیا فروخت کرنے والوں کے موبائل نمبرز اور دیگر تفصیلات حاصل کی جائیں گی۔

ایف بی آر ذرائع کے مطابق ای میلز اور موبائل نمبرز کے ذریعے سمگلڈ سامان بیچنے والوں کو ٹریس کیا جائے گا، شناخت کے لیے نادرا سے بھی مدد لی جائے گی جبکہ خلاف ورزی پر نوٹسز جاری کیے جائیں گے۔