ایس سی او، ای سی او اجلاسوں بارے متعلقہ ادارے مؤثر ہم آہنگی یقینی بنائیں: اسحاق ڈار

نائب وزیراعظم اور وزیرِ خارجہ سینیٹر محمد اسحاق ڈار کی زیرِ صدارت وزارتِ خارجہ میں ایک اہم اعلیٰ سطح کا اجلاس منعقد ہوا، جس میں سال 2027ء کے دوران اسلام آباد میں ہونے والے اہم کثیرالجہتی بین الاقوامی اجلاسوں کی تیاریوں کا تفصیلی جائزہ لیا گیا۔

ترجمان دفترِ خارجہ کے مطابق اجلاس میں آئندہ برس وفاقی دارالحکومت اسلام آباد میں شیڈول اقتصادی تعاون تنظیم (ECO) کے وزرائے خارجہ کونسل کے اجلاس اور شنگھائی تعاون تنظیم (SCO) کے کونسل آف ہیڈز آف اسٹیٹس (سربراہانِ مملکت) کے اجلاس کے انتظامات اور تیاریوں پر تفصیلی غور کیا گیا۔ اس موقع پر پاکستان کی سفارتی ترجیحات، علاقائی تعاون، اقتصادی شراکت داری اور خطے میں روابط (ریجنل کنیکٹیویٹی) کے فروغ سے متعلق کلیدی امور بھی زیرِ بحث آئے۔

اجلاس سے خطاب کرتے ہوئے نائب وزیراعظم و وزیرِ خارجہ اسحاق ڈار نے ہدایت کی کہ ان مجوزہ بین الاقوامی اجلاسوں کے کامیاب انعقاد کے لیے تمام متعلقہ وزارتیں اور ادارے آپس میں قریبی رابطے اور مؤثر ہم آہنگی کو یقینی بنائیں۔ انہوں نے مزید کہا کہ ان اہم اجلاسوں کی جامع اور ٹھوس تیاریوں کے ذریعے خطے کے مشترکہ مفادات کو آگے بڑھانے اور کثیرالجہتی تنظیموں سمیت علاقائی شراکت داروں کے ساتھ پاکستان کے سفارتی و معاشی روابط کو مزید مستحکم بنانے میں بھرپور مدد ملے گی۔