پنجاب حکومت کا زمین اور جائیداد کی رجسٹریوں کے نظام سے متعلق بڑا فیصلہ

پنجاب حکومت نے صوبے بھر میں زمین اور جائیداد کی رجسٹریوں کے نظام میں اہم اصلاحات کرتے ہوئے ڈویژنل ہیڈکوارٹرز میں تعینات ایڈیشنل اسسٹنٹ کمشنرز کو سب رجسٹرار کے اختیارات تفویض کر دیے ہیں، جس کا باضابطہ نوٹیفکیشن بورڈ آف ریونیو پنجاب کی جانب سے جاری کر دیا گیا ہے۔ نوٹیفکیشن کے مطابق رجسٹریشن ایکٹ 1908 کی دفعہ 6 کے تحت تفویض کیے گئے ان اختیارات کا اطلاق فوری طور پر ہو گیا ہے، جبکہ واضح کیا گیا ہے کہ زمین اور جائیداد کی تمام رجسٹریاں صرف پنجاب لینڈ ریکارڈ اتھارٹی (پی ایل آر اے) کے ای رجسٹریشن نظام کے ذریعے ہی مکمل کی جائیں گی۔ حکومت نے رجسٹریشن کے عمل میں شفافیت برقرار رکھنے کے لیے متعلقہ ڈپٹی کمشنرز کو ان افسران کی کڑی نگرانی اور مؤثر چیک اینڈ بیلنس یقینی بنانے کی ہدایت بھی جاری کی ہے، جبکہ اس فیصلے سے تمام ڈویژنل کمشنرز، ڈپٹی کمشنرز اور پنجاب لینڈ ریکارڈ اتھارٹی کو باضابطہ طور پر آگاہ کر دیا گیا ہے۔