پنجاب: ریسٹورینٹس میں ڈیجیٹل ادائیگیوں پر شہریوں کیلئے انعامی سکیم شروع کرنے کا فیصلہ

پنجاب ریونیو اتھارٹی (پی آر اے) نے صوبے بھر کے ہوٹلز اور ریسٹورنٹس سیکٹر میں شفافیت کے فروغ اور ٹیکس نظام کو مؤثر بنانے کے لیے صارفین کی خاطر خصوصی انعامی سکیم شروع کرنے کا فیصلہ کر لیا ہے۔ ترجمان پنجاب ریونیو اتھارٹی کے مطابق اس انعامی سکیم کے تحت ہوٹلز اور ریسٹورنٹس میں کیو آر کوڈ کے ذریعے ڈیجیٹل ادائیگیاں کرنے والے صارفین کو خصوصی سہولیات اور انعامات دیے جائیں گے، جبکہ کیو آر کوڈ کے ذریعے ادائیگیاں وصول کرنے سے انکار کرنے والے کاروباری مراکز کے خلاف سخت قانونی کارروائی عمل میں لائی جائے گی۔ ترجمان کا مزید کہنا تھا کہ ڈیجیٹل ادائیگیوں کے فروغ سے نہ صرف مالیاتی معاملات میں شفافیت آئے گی بلکہ ٹیکس نظام پر عوامی اعتماد میں بھی نمایاں اضافہ ہوگا۔