پیوٹن نے یوکرین جنگ ختم کرنے کے لیے امریکی دباؤ مسترد کردیا

روسی صدر ولادیمیر پیوٹن نے یوکرین جنگ کے خاتمے کے لیے اپنے سخت مؤقف اور علاقائی مطالبات میں کسی بھی قسم کی نرمی سے انکار کرتے ہوئے یوکرین میں غیر ملکی امن فوج کی تعیناتی کی تجویز کو بھی مسترد کر دیا ہے۔ کریملن میں امریکی صدر ڈونلڈ ٹرمپ کے خصوصی نمائندوں اسٹیو وٹکوف اور جیرڈ کشنر سے ملاقات کے دوران روسی صدر نے واضح کیا کہ ماسکو یوکرین کے ان علاقوں پر کنٹرول سے متعلق اپنے مطالبات کم نہیں کرے گا جنہیں روس نے اپنے ساتھ ضم کرنے کا دعویٰ کیا ہے، جبکہ جنگ بندی کے بعد غیر ملکی فوجیوں کی موجودگی دراصل جنگ جاری رکھنے کے مترادف ہوگی، تاہم انہوں نے ایک اہم محاذی شہر میں مختصر مدت کی جنگ بندی کی پیشکش ضرور کی۔ اسٹیو وٹکوف کے مطابق پیوٹن نے آئندہ دور کے مذاکرات میں یورپی ممالک کے نمائندوں کو شامل کرنے پر اتفاق کیا ہے، جس کے بعد امریکی نمائندے یوکرینی صدر ولودیمیر زیلنسکی سے ملاقات کے لیے آئرلینڈ کے دارالحکومت ڈبلن روانہ ہو گئے، جہاں زیلنسکی نے محاذ پر رابطوں کے لیے اہم سیٹلائٹ انٹرنیٹ سروس ’’اسٹار شیلڈ‘‘ پر نئی پابندیوں پر تشویش کا اظہار کرتے ہوئے کہا کہ اس اقدام سے روسی ڈرونز کو روکنے کی یوکرینی صلاحیت متاثر ہو رہی ہے۔