منشیات کیس: انمول عرف پنکی اور دیگر ملزمان پر فرد جرم عائد

کراچی کے جیل کمپلیکس میں قائم صوبائی انسدادِ منشیات عدالت نے ڈیفنس تھانے میں درج منشیات برآمدگی کے مقدمے میں نامزد ملزمہ انمول عرف پنکی اور اس کے دو شریک ملزمان عباد اور عزیز الرحمان پر باقاعدہ فردِ جرم عائد کر دی ہے، تاہم سماعت کے دوران عدالت کی جانب سے الزامات پڑھ کر سنائے جانے پر تینوں ملزمان نے صحتِ جرم سے انکار کر دیا۔ استغاثہ کے مطابق رواں سال درج کیے گئے اس مقدمے میں پولیس نے مشکوک افراد کو روکا تو ایک ملزم منشیات پھینک کر فرار ہو گیا جبکہ موٹر سائیکل سوار گرفتار ملزم عباد کے قبضے سے ایک کلو چرس برآمد ہوئی تھی، جس نے دورانِ تفتیش اعتراف کیا کہ یہ منشیات ملزمہ انمول عرف پنکی نے فراہم کی تھی۔ شریک ملزمان کے بیانات کی روشنی میں انمول پنکی کو بھی مقدمے میں نامزد کیا گیا تھا، جبکہ عدالت نے ملزمان کے انکار کے بعد استغاثہ کے گواہان کو طلب کرتے ہوئے مقدمے کی مزید سماعت 23 نومبر تک ملتوی کر دی ہے۔