طارق فضل چودھری نے پی ٹی آئی سے رابطوں بارے حقیقت بتا دی

وفاقی وزیر ڈاکٹر طارق فضل چودھری نے پاکستان تحریک انصاف (پی ٹی آئی) کے ساتھ کسی بھی قسم کے بیک ڈور یا فرنٹ ڈور رابطوں کی دوٹوک تردید کرتے ہوئے واضح کیا ہے کہ حکومت کے پاس نہ کوئی ڈیل ہے اور نہ ہی کوئی ڈھیل۔

اپنے ایک اہم بیان میں وفاقی وزیر نے کہا کہ اس وقت پی ٹی آئی سے پسِ پردہ یا علانیہ کوئی رابطہ نہیں ہو رہا، اور بیک ڈور رابطوں سے متعلق پھیلائی جانے والی باتیں محض قیاس آرائیاں اور خواہشات ہیں۔ انہوں نے واضح کیا کہ پی ٹی آئی کے تمام قانونی اور سیاسی معاملات صرف اور صرف عدالتوں سے ہی حل ہوں گے۔

ڈاکٹر طارق فضل چودھری نے اپوزیشن جماعت کی قیادت پر تنقید کرتے ہوئے کہا کہ ایک طرف پی ٹی آئی کے رہنما خود کو “آئرن مین” ظاہر کر رہے ہیں اور دوسری جانب خفیہ رابطوں کی باتیں بھی کر رہے ہیں، جو کہ ان کے اپنے ہی مؤقف سے کھلا تضاد ہے۔ وفاقی وزیر نے مزید کہا کہ متعلقہ معاملات پر حکومت کا باضابطہ جواب سامنے آ چکا ہے، لہٰذا پی ٹی آئی کے وکلا کو چاہیے کہ وہ طبی ماہر بننے کی کوشش نہ کریں بلکہ صرف قانونی نکات پر اپنی توجہ مرکوز رکھیں، کیونکہ انہیں کوئی بھی ریلیف یا راستہ عدالت ہی سے ملے گا۔