ملک کے 97 منتخب اضلاع میں ذیلی قومی انسدادِ پولیو مہم مکمل

نیشنل ایمرجنسی آپریشنز سینٹر (نیشنل ای او سی) کے مطابق ملک بھر کے 97 منتخب اضلاع میں 2 سے 8 نومبر تک جاری رہنے والی ذیلی قومی انسدادِ پولیو مہم کامیابی سے اختتام پذیر ہو گئی ہے، جس کے دوران 2 لاکھ سے زائد پولیو ورکرز نے 2 کروڑ 40 لاکھ سے زائد بچوں کو پولیو سے بچاؤ کے قطرے پلائے۔ مہم کے تحت پنجاب کے 13 اضلاع میں 91 لاکھ 96 ہزار، سندھ کے 20 اضلاع میں 71 لاکھ 4 ہزار، خیبر پختونخوا کے 27 اضلاع میں 46 لاکھ 97 ہزار، بلوچستان کے 31 اضلاع میں 22 لاکھ 36 ہزار، اسلام آباد میں 4 لاکھ 50 ہزار، آزاد کشمیر کے 2 اضلاع میں ایک لاکھ 91 ہزار جبکہ گلگت بلتستان کے 3 اضلاع میں ایک لاکھ 61 ہزار سے زائد بچوں کی ویکسینیشن کی گئی۔ نیشنل ای او سی نے خبردار کیا ہے کہ رواں سال ملک میں اب تک پولیو کے 9 کیسز (7 خیبر پختونخوا اور 2 سندھ سے) رپورٹ ہو چکے ہیں، جبکہ کراچی، کوئٹہ، پشاور بلاکس اور جنوبی خیبر پختونخوا میں وائرس کی مسلسل موجودگی کے پیشِ نظر والدین پانچ سال سے کم عمر بچوں کو ہر مہم میں قطرے اور معمول کے حفاظتی ٹیکوں کا کورس لازمی مکمل کروائیں۔