کراچی سمیت سندھ بھر میں 2ماہ کے دوران ڈینگی کے سب سے زیادہ کیسز رپورٹ

کراچی سمیت صوبہ سندھ بھر میں گزشتہ دو ماہ (ستمبر اور اکتوبر) کے دوران ڈینگی کے سب سے زیادہ 2 ہزار 55 کیسز رپورٹ ہوئے ہیں، جبکہ رواں سال کراچی میں ڈینگی کے کل کیسز 2 ہزار 369 تک پہنچ گئے اور ایک ہلاکت بھی سامنے آئی۔ اعدادوشمار کے مطابق سندھ کے اضلاع میں ضلع شرقی 709 کیسز کے ساتھ سب سے زیادہ متاثر ہوا، جبکہ حیدرآباد، میرپورخاص، لاڑکانہ اور سکھر سمیت دیگر اضلاع میں 2 ہزار 100 مجموعی کیسز سامنے آئے۔ ماہرِ صحت ڈاکٹر عمر سلطان کے مطابق ڈینگی صاف پانی پر نشوونما پانے والے مادہ مچھر کے کاٹنے سے ہوتا ہے جس کی علامات میں تیز بخار، جسم میں شدید درد اور پلیٹیلیٹس کی خطرناک حد تک کمی شامل ہے۔ ماہرین نے شہریوں کو صبح اور مغرب کے وقت مچھر بھگاؤ اشیاء کا استعمال کرنے، پانی کی وافر مقدار پینے اور بخار کی صورت میں فوری ڈاکٹر سے رجوع کرنے کی ہدایت کی ہے۔