قرآنی آیت کندہ ہار پہننے پر بالی ووڈ اداکارہ کرینہ کپور اور اسٹائلسٹ کو قانونی نوٹس جاری

بالی ووڈ کی معروف اداکارہ کرینہ کپور خان کو قرآنی آیت کندہ ہار پہننے پر قانونی نوٹس جاری کر دیا گیا ہے۔ بھارتی میڈیا رپورٹس کے مطابق مدھیہ پردیش کانگریس کے ترجمان عباس حفیظ نے اداکارہ کرینہ کپور اور ان کی اسٹائلسٹ ریحا کپور کو باقاعدہ قانونی نوٹس بھجوایا ہے۔ کرینہ کپور نے حال ہی میں دیوالی کے تہوار کے موقع پر روایتی لباس میں اپنی تصاویر سوشل میڈیا پر شیئر کی تھیں، جن میں ان کے گلے میں پہنے گئے زمرد کے ہار پر ’آیت الکرسی‘ کندہ دکھائی دے رہی تھی۔ کانگریس ترجمان عباس حفیظ نے نوٹس میں مؤقف اختیار کیا ہے کہ مقدس قرآنی آیات کو فیشن یا آرائش کے طور پر استعمال کرنے سے مسلمانوں کے مذہبی جذبات مجروح ہو سکتے ہیں۔