مصنوعی ذہانت سے تیار کردہ برڈ فلو کی نئی ویکسین کی کامیاب آزمائش

یونیورسٹی آف کیمبرج اور اس کے ذیلی ادارے ‘DIOSynVax’ نے مصنوعی ذہانت (AI) کی مدد سے برڈ فلو کے خلاف ایک نئی ویکسین تیار کی ہے جس نے ابتدائی تجربات میں غیر معمولی کامیابی حاصل کی ہے۔ سائنسی جرنل ’سیل رپورٹس میڈیسن‘ میں شائع تحقیق کے مطابق پروفیسر جوناتھن ہینی کی قیادت میں تیار کردہ اس ویکسین نے تجرباتی جانوروں (چوہوں اور فیریٹس) کو برڈ فلو کی جینیاتی طور پر مختلف اور انسانوں کو متاثر کرنے والی تمام اقسام سے مکمل تحفظ فراہم کیا، جبکہ روایتی ویکسین سے صرف نصف جانور بچ سکے۔ محققین کا کہنا ہے کہ وائرس میں مسلسل جینیاتی تبدیلیوں کے باعث روایتی ویکسینز کو بار بار اپ ڈیٹ کرنا پڑتا تھا، تاہم اے آئی ٹیکنالوجی سے ایسی عالمگیر ویکسینز کی راہ ہموار ہو گئی ہے جو وائرس کی متعدد اقسام کے خلاف بیک وقت کارآمد ثابت ہوں گی؛ تاہم انسانوں میں اس کے استعمال کے لیے مزید کلینیکل آزمائشیں جاری رہیں گی۔