عورت حمل اور زچگی کے بعد اپنے ساتھ ہونے والا سلوک کبھی نہیں بھولتی: ماہرہ خان

پاکستانی اداکارہ ماہرہ خان نے حاملہ خواتین کی نگہداشت اور زچگی کے بعد ان کے ساتھ اچھے رویے کی اہمیت پر زور دیتے ہوئے کہا ہے کہ ایک عورت اپنی زندگی کے اس حساس مرحلے پر کیے گئے سلوک کو کبھی نہیں بھولتی۔ انسٹاگرام پر جاری کردہ اپنے پیغام میں انہوں نے بالواسطہ طور پر ان لوگوں کو مخاطب کیا جو حمل کے دوران یا بچے کی پیدائش کے بعد خواتین سے مناسب رویہ نہیں رکھتے۔ ماہرہ خان نے واضح کیا کہ یہ عورت کی زندگی کا ایک نازک وقت ہوتا ہے جس میں اسے محبّت، احترام اور بھرپور تعاون کی اشد ضرورت ہوتی ہے۔ واضح رہے کہ 41 سالہ ماہرہ خان ان دنوں اپنے دوسرے بچے کی آمد کی منتظر ہیں، جو ان کے شوہر سلیم کریم کے ساتھ ان کی پہلی اولاد ہوگی جبکہ ان کے پہلے شوہر سے ایک بیٹا اذلان ہے۔ سوشل میڈیا پر تنقید کے باوجود اداکارہ نے مداحوں کی نیک تمناؤں اور محبت پر توجہ مرکوز رکھی ہے۔