پاکستان میں دو دہائیوں بعد تیل و گیس کی تلاش کی سرگرمیاں بحال ہونے کی تیاری

پاکستان میں 20 سال کے طویل عرصے بعد سمندر میں تیل و گیس کی تلاش کی آف شور سرگرمیاں باقاعدہ بحال ہونے جا رہی ہیں، جس کے سلسلے میں ترک پٹرولیم کمپنی کا جدید ترین سیسمک سروے جہاز 17 سے 20 نومبر کے درمیان کراچی کی بندرگاہ پر پہنچ جائے گا۔

وفاقی وزیر برائے پٹرولیم علی پرویز ملک کی زیرِ صدارت اسلام آباد میں منعقدہ اعلیٰ سطحی اجلاس میں ترک جہاز کی آمد، سیکیورٹی، لائیو آپریشنز اور سمندری انتظامات کا تفصیلی جائزہ لیا گیا۔ اجلاس کے دوران وفاقی وزیر پٹرولیم نے اعلان کیا کہ وہ ترک جہاز کی کراچی آمد پر ذاتی طور پر اس کا استقبال کریں گے۔ انہوں نے کہا کہ یہ اقدام پاکستان اور ترکیہ کی دیرینہ دوستی اور حال ہی میں طے پانے والے تاریخی “مکہ معاہدے” (Mecca Defense Pact) کے بعد توانائی کے شعبے میں تعاون کا ایک انتہائی اہم سنگِ میل ہے۔

علی پرویز ملک نے مزید کہا کہ یہ آف شور منصوبہ پاکستان کی توانائی کی سلامتی، ملکی معیشت کی استحکام اور ترکیہ کے ساتھ دوطرفہ روابط کے فروغ میں تاریخی کردار ادا کرے گا۔ ترکیہ کی پٹرولیم کمپنی کے پروجیکٹ مینیجر نے پاکستانی حکام کے بھرپور اور بلا تعطل تعاون پر شکریہ ادا کیا، جبکہ اجلاس میں تمام متعلقہ اداروں کو کراچی میں آپریشنز کی کامیابی کے لیے مکمل باہمی رابطہ کاری برقرار رکھنے کی ہدایت جاری کر دی گئی ہے۔