شہباز شریف سے سوڈان کے وزیر داخلہ کی ملاقات، دوطرفہ تعلقات پر تبادلہ خیال

وزیراعظم محمد شہباز شریف سے سوڈان کے وزیر داخلہ لیفٹیننٹ جنرل بابیکر سمرا مصطفیٰ علی نے اسلام آباد میں اعلیٰ سطحی ملاقات کی۔ وزیراعظم نے سوڈانی وزیر داخلہ کو پاکستان آمد پر خوش آمدید کہا اور دونوں ممالک کے درمیان تاریخی رشتوں کا اعادہ کیا۔

ملاقات کے دوران گفتگو کرتے ہوئے وزیراعظم شہباز شریف نے کہا کہ پاکستان سوڈان کے ساتھ اپنے دیرینہ اور برادرانہ تعلقات کو انتہائی اہمیت دیتا ہے۔ پاکستان کی خواہش ہے کہ سوڈان اپنے موجودہ داخلی بحران سے نکل کر ایک پرامن، مستحکم اور خوشحال ملک کے طور پر ابھرے۔ انہوں نے کہا کہ دونوں ممالک کے درمیان زراعت، دفاع، تعلیم، تجارت اور سرمایہ کاری کے شعبوں میں دوطرفہ تعاون بڑھانے کے وسیع مواقع موجود ہیں۔ وزیراعظم نے اقوامِ متحدہ، او آئی سی اور جی-77 جیسے عالمی فورمز پر سوڈان کے مسلسل تعاون کی تعریف کی۔

سوڈان کے وزیر داخلہ نے بہترین میزبانی پر وزیراعظم اور حکومتِ پاکستان کا شکریہ ادا کیا اور مشکل حالات میں پاکستان کی جانب سے فراہم کی جانے والی انسانی و طبی امداد پر اظہارِ تشکر کیا۔ انہوں نے سوڈان میں امن و امان کی بحالی اور عالمی سطح پر سفارتی حمایت پر پاکستان کے کردار کی بھی تعریف کی۔ ملاقات میں نائب وزیراعظم و وزیر خارجہ اسحاق ڈار، وفاقی وزیر داخلہ محسن نقوی، وزیر مملکت طلال چوہدری اور معاون خصوصی طارق فاطمی بھی موجود تھے