آزاد کشمیر کی حیثیت تبدیلی بارے سوشل میڈیا پر وائرل خبریں بے بنیاد ہیں: وزیراعظم

وزیراعظم آزاد کشمیر افتخار گیلانی نے واضح طور پر کہا ہے کہ آزاد کشمیر کی آئینی حیثیت تبدیل کرنے سے متعلق سوشل میڈیا پر گردش کرنے والی تمام تر خبریں بالکل بے بنیاد، من گھڑت اور حقائق کے برعکس ہیں۔

آزاد جموں و کشمیر قانون ساز اسمبلی کے اجلاس سے خطاب کرتے ہوئے وزیراعظم افتخار گیلانی نے کہا کہ خطے کی آئینی حیثیت اور مالیاتی خودمختاری پر کسی بھی صورت کوئی سمجھوتہ نہیں کیا جا سکتا، اور حکومت ریاست کا اسٹیٹس تبدیل کرنے کا سوچ بھی نہیں سکتی۔ انہوں نے اپوزیشن اور عوام سے اپیل کی کہ وہ سوشل میڈیا پر پھیلائے جانے والے “جھوٹ کے طوفان” اور افواہوں پر کان نہ دھریں جن کا مقصد خطے میں انتشار اور بے یقینی پیدا کرنا ہے۔ انہوں نے واویلا کرنے والوں کو چیلنج دیا کہ اگر ان کے پاس کوئی ثبوت یا معلومات ہیں تو وہ حکومت کے سامنے لائیں، نیز یقین دہانی کرائی کہ تمام ریاستی امور میں اپوزیشن کو اعتماد میں لیا جائے گا۔

تعلیمی اصلاحات پر بات کرتے ہوئے وزیراعظم آزاد کشمیر نے اعلان کیا کہ میرپور تعلیمی بورڈ کی کوالٹی کو بین الاقوامی معیار کے مطابق ڈھالنے کے لیے کیمبرج یونیورسٹی بورڈ کے ساتھ ایک اہم مفاہمتی یادداشت (MoU) پر دستخط کیے جا رہے ہیں۔ انہوں نے کہا کہ اس پیشرفت سے میرپور بورڈ پاکستان اور خطے کا بہترین تعلیمی ادارہ بن کر ابھرے گا، اور اسے ضلعی یا ڈویژنل تفریق سے بالاتر ہو کر دیکھنے کی ضرورت ہے