آسٹریہ میں پاکستانی سفارت خانے کے اکاؤنٹنٹ کی خورد برد کا انکشاف

چیئرمین سید نوید قمر کی زیر صدارت پارلیمنٹ کی پبلک اکاؤنٹس کمیٹی (PAC) کا اہم اجلاس منعقد ہوا، جس میں آسٹریہ اور بلغاریہ میں واقع پاکستانی سفارت خانوں میں تعينات اکاؤنٹنٹس کی جانب سے کروڑوں روپے کی سنگین مالی خورد برد کا سنسنی خیز انکشاف سامنے آیا ہے۔

اجلاس کے دوران آڈٹ حکام نے کمیٹی کو بریفنگ دیتے ہوئے بتایا کہ آسٹریہ میں پاکستانی سفارت خانے کے اکاؤنٹنٹ سلمان قریشی نے 16 کروڑ 56 لاکھ روپے کی خطیر رقم کا غبن کیا۔ حکام کے مطابق ملزم نے یہ قومی رقم اپنے اور اپنی اہلیہ کے ذاتی بینک اکاؤنٹس میں منتقل کی، جس کے بعد معاملہ تحقیقات کے لیے فیڈرل انویسٹی گیشن ایجنسی (FIA) کے سپرد کر دیا گیا تھا۔ ایف آئی اے کے نمائندوں نے بتایا کہ مقدمے میں اب تک دو ایف آئی آرز درج کی جا چکی ہیں اور ملزم کو گرفتار بھی کیا گیا تھا، تاہم وہ فی الوقت ضمانت پر رہا ہے۔

کیس کی سست روی اور تاخیر پر شدید برہمی کا اظہار کرتے ہوئے چیئرمین پی اے سی سید نوید قمر نے کہا کہ 6 سال کا طویل عرصہ گزرنے کے باوجود اب تک صرف ایف آئی آرز ہی درج ہو سکی ہیں جو کہ ایف آئی اے کی انتہائی مایوس کن کارکردگی کو ظاہر کرتا ہے۔ انہوں نے سخت جملے ادا کرتے ہوئے کہا کہ یوں لگتا ہے جیسے ایف آئی اے کی تمام تر توجہ صرف سیاسی مقدمات تک محدود ہے۔ پبلک اکاؤنٹس کمیٹی نے ایف آئی اے کی عدم توجہی پر سخت نوٹس لیتے ہوئے آئندہ اجلاس میں ڈائریکٹر جنرل (ڈی جی) ایف آئی اے کو ذاتی طور پر طلب کر لیا ہے۔