ون کانسٹیٹیوشن منصوبے کے متاثرین کو معاوضہ ادا کیا جائے گا: احسن اقبال

وفاقی وزیر برائے منصوبہ بندی و ترقی احسن اقبال نے اعلان کیا ہے کہ ون کانسٹی ٹیوشن ایونیو اسکام کے متاثرین کو ان کا پورا معاوضہ ادا کیا جائے گا، جبکہ کابینہ نے اس منصوبے میں ہونے والے اربوں روپے کے فراڈ پر نیب کی اعلیٰ سطحی انکوائری رپورٹ منظور کر لی ہے۔

وفاقی وزیر اطلاعات عطا تارڑ اور وزیر مملکت برائے داخلہ طلال چوہدری کے ہمراہ اسلام آباد میں مشترکہ پریس کانفرنس کرتے ہوئے احسن اقبال نے بتایا کہ وزیراعظم پاکستان کی جانب سے قائم کردہ جے آئی ٹی کی تحقیقاتی رپورٹ میں ثابت ہوا ہے کہ اس منصوبے میں تمام قواعد و ضوابط کو ردی کی ٹوکری میں پھینک دیا گیا تھا اور سی ڈی اے (CDA) نے اس سلسلے میں مجرمانہ کوتاہی برتی۔ انہوں نے کہا کہ منصوبے کا نام بھی جعل سازی سے ‘ون کانسٹی ٹیوشن ایونیو’ رکھا گیا تھا کیونکہ اس اہم شاہراہ پر پہلی رسمی عمارت وزارتِ خارجہ کی ہے، لہٰذا جے آئی ٹی کی سفارش پر اس منصوبے کا نام تبدیل کیا جا رہا ہے۔

پریس کانفرنس کے دوران وزیر مملکت برائے داخلہ طلال چوہدری نے کہا کہ اعلیٰ سطح کی سہولت کاری کے باعث بے گناہ شہریوں کو لوٹا گیا، جن کا کوئی قصور نہیں تھا، اسی لیے نیب کو 3 ماہ کے اندر باقاعدہ ریفرنس دائر کرنے کا وقت دیا گیا ہے۔ وزیر اطلاعات عطا تارڑ نے مزید بتایا کہ جے آئی ٹی کی سفارشات کی روشنی میں نیب اب مکمل میرٹ اور بغیر کسی رعایت کے شفاف تحقیقات آگے بڑھائے گا۔