ایف بی آر نے سیلز ٹیکس رولز میں بڑی ترمیم کر دی

فیڈرل بورڈ آف ریونیو (ایف بی آر) نے سیلز ٹیکس رولز میں اہم ترمیمی نوٹیفکیشن جاری کرتے ہوئے گھریلو الیکٹریکل سامان کا دائرہ کار وسیع کر دیا ہے، جس کے تحت متعدد نئی اشیاء پر ٹریکنگ کے لیے ٹیکس اسٹیمپ (Tax Stamp) لگانا اور اسے فعال کرنا قانوناً لازمی قرار دے دیا گیا ہے۔

ایف بی آر کے نئے قواعد و ضوابط کے مطابق ایئر کنڈیشنر، فریج، فریزر، واشنگ مشین اور ٹیلی ویژن کے ساتھ ساتھ اسٹوریج بیٹریوں کو بھی اس نئے ٹیکس نیٹ ورک میں شامل کر لیا گیا ہے۔ ان قواعد کا اطلاق مقامی پیداوار کے علاوہ درآمدی الیکٹرانکس پر بھی یکساں ہوگا، اور کسی بھی درآمدی سامان پر کلیئرنس سے قبل ٹیکس اسٹیمپ کی تنصیب اور ایکٹیویشن کے بغیر کسٹم کلیئرنس کی اجازت نہیں دی جائے گی۔ ریٹیل اور آٹو کمپنیوں کو سپلائی کی جانے والی اسٹوریج بیٹریاں اور اسٹیٹ اونڈ انٹرپرائزز (SOEs) بھی ان نئے قواعد کی پابند ہوں گی، تاہم بیٹریوں کے پرزہ جات کو ان ضوابط سے مستثنیٰ رکھا گیا ہے۔

نوٹیفکیشن کے مطابق ٹیکس اسٹیمپ مصنوعات اور ان کی پیکنگ دونوں پر چسپاں کیا جائے گا۔ ایف بی آر نے ٹریک اینڈ ٹریس سسٹم کے لائسنس کے حصول کے لیے صرف “کمپنی” ہونے کی لازمی شرط ختم کرتے ہوئے تمام اہل درخواست گزاروں کو لائسنس کے لیے اہل قرار دے دیا ہے، جبکہ ایک لائسنس صرف ایک مخصوص پروڈکٹ کی ٹریکنگ کے لیے استعمال ہو سکے گا۔ بورڈ نے واضح کیا ہے کہ ٹریکنگ سسٹم کا تمام تر ڈیٹا اور سیکیورٹی کوڈز حکومتِ پاکستان کی ملکیت ہوں گے اور لائسنس کی مدت ختم ہونے پر لائسنس ہولڈر تمام ریکارڈ ایف بی آر کے حوالے کرنے کا پابند ہو گا۔