آزاد ڈیجیٹل کے سی ای او اور اہلِ خانہ کو مبینہ دھمکیوں کی شکایت این سی سی آئی اے میں درج

آن لائن نیوز میڈیا پلیٹ فارم ‘آزاد ڈیجیٹل’ (Azad Digital) کے سی ای او اور ان کے اہلِ خانہ کو مبینہ طور پر سنگین نتائج کی دھمکیاں دینے، جان سے مارنے کی پرتشدد ترغیب دینے اور ہراساں کرنے کا معاملہ نیشنل سائبر کرائم انویسٹی گیشن ایجنسی (NCCIA) تک پہنچ گیا ہے، جہاں ضیاء الرحمن، راشد سومرو، ناصر سومرو اور مفتی اویس نامی افراد کے خلاف باضابطہ قانونی شکایت درج کرا دی گئی ہے۔

آزاد ڈیجیٹل کے سی ای او کی ہدایت پر ادارے کے ڈیسک انچارج عدیل عمر نے این سی سی آئی اے کے سائبر ونگ میں شکایت جمع کراتے ہوئے متعلقہ نامزد افراد اور ان سے منسلک فیس بک اکاؤنٹس و آپریٹرز کے خلاف فوری تحقیقات، سائبر قوانین کے تحت سخت کارروائی اور سی ای او سمیت ان کے خاندان کی جان و مال کے تحفظ کو یقینی بنانے کی استدعا کی ہے۔

درخواست میں الزام عائد کیا گیا ہے کہ آزاد ڈیجیٹل کے پلیٹ فارم سے صحافتی پروگرامز کی نشر و اشاعت کے بعد ضیاء الرحمن، مفتی اویس اور ناصر سومرو سمیت راشد سومرو نے مبینہ طور پر سی ای او کو جان سے مارنے کی براہِ راست دھمکیاں دیں اور مختلف فیس بک پروفائلز کے ذریعے دھمکی آمیز مواد اور نفرت انگیز پوسٹس شیئر کیں۔ شکایت دہندہ نے ان تمام دھمکی آمیز سرگرمیوں سے منسلک 4 فیس بک پروفائلز کے یو آر ایل (URL) لنکس اور اسکرین شاٹس بطورِ ثبوت این سی سی آئی اے کو فراہم کر دیے ہیں۔ ادارے نے واقعے کی حساسیت اور سنگینی کے پیشِ نظر حکام سے ہنگامی بنیادوں پر کارروائی کا مطالبہ کیا ہے۔