امریکی مڈٹرم انتخابات: متعدد پاکستانی امریکن امیدوار بھی ریاستی انتخابات میں کامیاب

امریکا کے وسط مدتی انتخابات میں پاکستانی نژاد امریکی امیدواروں نے نمایاں کارکردگی کا مظاہرہ کرتے ہوئے مختلف ریاستوں میں تاریخی کامیابیاں حاصل کی ہیں۔ رپورٹس کے مطابق پنسلوانیا کی ریاستی اسمبلی میں ڈیموکریٹ مریم صبیح سینیٹ ڈسٹرکٹ 2 سے رکن منتخب ہو گئی ہیں، جبکہ کنیکٹیکٹ کے ریاستی سینیٹ ڈسٹرکٹ 3 سے ڈاکٹر سعود انور دوبارہ کامیابی حاصل کرنے میں کامیاب رہے ہیں۔ ٹیکساس کے انتخابی میدان میں سلمان بھوجانی نے ڈسٹرکٹ 92 سے 67 فیصد ووٹ حاصل کر کے اور سلیمان لالانی نے ڈسٹرکٹ 76 سے 67 فیصد ووٹوں کی واضح اکثریت کے ساتھ اپنی اپنی نشستوں کا کامیابی سے دفاع کیا۔ اس کے علاوہ جارجیا کے ڈسٹرکٹ 105 سے فاروق مغل 60.8 فیصد ووٹ لے کر ریاستی اسمبلی کی نشست پر کامیاب قرار پائے ہیں۔