پی آئی اے کے نئے سی ای او ایڈرین ہملٹن مانز نے چارج سنبھال لیا، 30 سالہ ہوابازی کا تجربہ رکھنے والے پہلے غیر ملکی سربراہ

پاکستان انٹرنیشنل ایئرلائنز (پی آئی اے) کے نئے سی ای او ایڈرین ہملٹن مانز نے اپنے عہدے کا باضابطہ چارج سنبھال لیا ہے۔ ایڈرین ہملٹن عالمی کمرشل ہوابازی میں 30 سالہ وسیع تجربہ رکھتے ہیں اور اس سے قبل عمان، قازقستان اور افریقہ کی تین مختلف ایئرلائنز کے سی ای او کے طور پر خدمات انجام دے چکے ہیں۔ پی آئی اے بورڈ اور کنسورشیم نے سبکدوش ہونے والے سی ای او ایئر وائس مارشل (ر) عامر حیات کی خدمات کو سراہتے ہوئے ان کا شکریہ ادا کیا، جن کے دور میں ایئرلائن کے سیفٹی معیار میں بہتری آئی اور یورپ و برطانیہ کے روٹس پر عائد پابندیوں کا خاتمہ ممکن ہوا۔ چیئرمین پی آئی اے نے نئے سی ای او کا خیرمقدم کرتے ہوئے امید ظاہر کی کہ وہ اپنے تجربے کو بروئے کار لاتے ہوئے ادارے کی خدمات کو عالمی معیار کے مطابق ڈھالیں گے۔