عوام کو 15 روپے لٹر سستا پٹرول فراہم کرنے کی کوشش کر رہے ہیں: علی پرویز

وفاقی وزیر پٹرولیم علی پرویز ملک نے وزیر اطلاعات عطاء اللہ تارڑ کے ہمراہ پریس کانفرنس کرتے ہوئے اعلان کیا ہے کہ حکومت آئل ریفائنریز کے تعاون سے عوام کو 15 روپے فی لیٹر سستا پٹرول فراہم کرنے کے لیے کوششیں کر رہی ہے۔ انہوں نے بتایا کہ عالمی منڈی میں قیمتوں اور لاجسٹکس اخراجات کے اضافے کی وجہ سے پٹرول میں 15 روپے اضافے کا امکان تھا، تاہم ریفائنریز کے 15 ارب روپے کا بوجھ برداشت کرنے کے باعث قیمتیں برقرار رکھی گئیں۔ اس موقع پر عطاء اللہ تارڑ نے کہا کہ وزیراعظم کے فیول ریلیف پیکیج سے اب تک ڈیڑھ کروڑ سے زائد افراد فائدہ اٹھا چکے ہیں اور 27 ارب روپے کی مالی معاونت فراہم کی جا چکی ہے، جس کا دائرہ کار موٹر سائیکل، رکشہ اور 800 سی سی گاڑی مالکان تک پھیلا ہوا ہے۔