ناروے میں 60 ہزار پاکستانی آباد، براہ راست پروازوں کی بحالی کیلئے کام کررہے ہیں: عاصم علی

ناروے میں متعین پاکستانی سفیر عاصم علی خان نے انکشاف کیا ہے کہ ناروے میں 60 ہزار سے زائد پاکستانی آباد ہیں جو اسکینڈینیوین ممالک میں سب سے بڑی کمیونٹی ہے، اور ان کی سہولت کے لیے پاکستان اور ناروے کے درمیان براہِ راست پروازوں کی بحالی پر پیش رفت جاری ہے۔ دنیا نیوز سے گفتگو کرتے ہوئے انہوں نے بتایا کہ ماضی کی طرح براہِ راست فلائٹس کا سلسلہ دوبارہ شروع کرنے کے لیے پی آئی اے اور دیگر متعلقہ حکام سے مسلسل رابطے میں ہیں جبکہ دونوں ممالک کے درمیان تین وفود کا تبادلہ بھی ہو چکا ہے۔ انہوں نے مزید کہا کہ یہ پروازیں پاکستانی نجی ایئرلائنز کے لیے بھی بہترین کاروباری موقع ثابت ہو سکتی ہیں، اور اگرچہ حتمی تاریخ دینا قبل از وقت ہے تاہم جلد خوشخبری ملنے کی امید ہے۔