دہشت گردی کے سہولت کاروں میں خیبرپختونخوا کی نااہل حکومت بھی تھی: ترجمان پاک فوج

ڈی جی آئی ایس پی آر لیفٹیننٹ جنرل احمد شریف چودھری نے عالمی خبر رساں ادارے کو انٹرویو دیتے ہوئے کہا ہے کہ پاک فوج کے پاس دہشت گردوں اور ان کے تمام سہولت کاروں کو ختم کرنے کی واضح حکمتِ عملی موجود ہے اور خیبرپختونخوا میں کسی بڑے ملٹری آپریشن کی بجائے روزانہ کی بنیاد پر 200 کے قریب انٹیلی جنس بیسڈ آپریشنز کیے جا رہے ہیں۔ انہوں نے کہا کہ خیبرپختونخوا کا غیور عوام امن کا طالب اور مستحق ہے، جبکہ صوبے میں انسدادِ دہشت گردی کی مخالفت صرف وہی عناصر کرتے ہیں جن کا دہشت گردوں سے گٹھ جوڑ ہے۔ ترجمان پاک فوج نے مزید کہا کہ ہم بھارت کی طرح تمام داخلی مسائل کی ذمہ داری باہر نہیں ڈالتے، تاہم افغانستان میں دہشت گردوں کے تربیتی کیمپس اور لانچ پیڈز موجود ہیں۔ بلوچستان کی صورتِ حال پر بات کرتے ہوئے انہوں نے کہا کہ دہشت گرد اور مقامی اشرافیہ صوبے میں ترقیاتی منصوبوں اور معاشی سرگرمیوں کو سبوتاژ کر کے عوام کو پسماندہ رکھنے کے لیے گٹھ جوڑ کیے ہوئے ہیں۔