لاہور میں آلودگی کی شرح میں اضافہ، فضائی معیار انتہائی مضر صحت قرار

لاہور میں آج موسم خشک رہنے کی پیشگوئی کی گئی ہے جبکہ شہر کی ہوا میں آلودگی اور سموگ کی شرح انتہائی مضرِ صحت سطح تک پہنچ گئی ہے۔ محکمہ موسمیات کے مطابق شہر کا کم سے کم درجہ حرارت 17 اور زیادہ سے زیادہ 30 ڈگری سینٹی گریڈ رہنے کا امکان ہے، جبکہ ہوا میں نمی کا تناسب 69 فیصد ریکارڈ کیا گیا ہے۔ دوسری جانب، فضائی آلودگی کے لحاظ سے لاہور ملک کا دوسرا آلودہ ترین شہر بن گیا ہے، جہاں سموگ کا اوسط ایئر کوالٹی انڈیکس (AQI) 475 ریکارڈ کیا گیا۔ علامہ اقبال ٹاؤن میں ایئر کوالٹی انڈیکس 704 اور ماڈل ٹاؤن میں 481 کی خطرناک ترین سطح پر پہنچ چکا ہے، جس پر ماہرینِ صحت نے شہریوں کو احتیاطی تدابیر اختیار کرنے کی ہدایت کی ہے۔