کراچی میں دھند سے حد نگاہ متاثر، کئی بین الاقوامی پروازوں کا رخ موڑ دیا گیا

کراچی کے مختلف علاقوں میں صبح کے وقت شدید دھند کے باعث حدِ نگاہ انتہائی کم ہو گئی، جس کے نتیجے میں متعدد بین الاقوامی پروازوں کو متبادل ایئرپورٹس منتقل کر دیا گیا۔ سرجانی ٹاؤن، سپر ہائی وے، سہراب گوٹھ، گلستانِ جوہر، آئی آئی چندریگر روڈ، کلفٹن، ڈیفنس اور ایم نائن موٹروے سمیت شہر کے مختلف علاقوں میں دھند چھائی رہی۔
محکمہ موسمیات کے مطابق شہر کا کم سے کم درجہ حرارت 17.5 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 28 سے 30 ڈگری رہنے کا امکان ہے۔ آئندہ 24 گھنٹوں میں موسم زیادہ تر ابرآلود اور رات میں خنکی رہنے کی پیشگوئی کی گئی ہے۔
ترجمان پاکستان ایوی ایشن اتھارٹی کے مطابق دھند کے باعث 6 بین الاقوامی پروازیں مسقط جبکہ جدہ سے آنے والی ایک نجی ایئر لائن کی پرواز اسلام آباد منتقل کی گئی، محدود حدِ نگاہ میں پروازوں کی منتقلی حفاظتی اقدام ہے۔