پارلیمنٹ کے اندر اور باہر بھرپور کردار ادا کریں گے، بانی پی ٹی آئی تک رسائی اور گورنر راج پر مکمل حکمتِ عملی طے: بیرسٹر علی ظفر

پاکستان تحریک انصاف (پی ٹی آئی) کے سینیٹ میں پارلیمانی لیڈر بیرسٹر علی ظفر نے میڈیا سے گفتگو کرتے ہوئے بتایا ہے کہ پارلیمانی پارٹی کے آج کے مشترکہ اجلاس میں 70 سے زائد ارکان نے شرکت کی ہے اور کئی اہم نوعیت کے فیصلے کیے گئے ہیں۔

بیرسٹر علی ظفر کا کہنا تھا کہ اجلاس میں یہ طے کیا گیا ہے کہ پی ٹی آئی کی پارلیمانی پارٹی پارلیمنٹ کے اندر اور باہر اپنا بھرپور اور مؤثر کردار ادا کرے گی۔ انہوں نے مزید بتایا کہ اجلاس کے دوران آئندہ کے لائحہ عمل پر بھی تفصیلی مشاورت کی گئی ہے، جسے حتمی منظوری کے لیے اپوزیشن لیڈران کے سامنے رکھا جائے گا، اور اس سلسلے میں مستقبل کے لائحہ عمل کے لیے ایک خصوصی کمیٹی بھی تشکیل دی جائے گی جس کی قیادت اپوزیشن لیڈران کریں گے۔ بیرسٹر علی ظفر نے انکشاف کیا کہ اجلاس میں ملک میں گورنر راج، پارٹی رہنماؤں کی غیر قانونی نظر بندی، بانی پی ٹی آئی کی بہنوں کی گرفتاری اور بانی چیئرمین تک رسائی نہ ملنے کے سنگین مسائل پر ایک مکمل اور جامع حکمتِ عملی تشکیل دے دی گئی ہے، جس کے تمام فیصلوں کا باضابطہ اعلان کل ایک اعلامیے کے ذریعے کیا جائے گا۔