ایران نے امریکا اور اسرائیل کے ساتھ دوبارہ فوجی تصادم کا خدشہ ظاہر کر دیا

ایرانی وزیرِ خارجہ عباس عراقچی نے امریکا اور اسرائیل کے ساتھ دوبارہ مسلح فوجی تنازع شروع ہونے کا خدشہ ظاہر کرتے ہوئے واضح انتباہ جاری کیا ہے کہ ایران کے خلاف کسی بھی نئی فوجی کارروائی کا پوری طاقت سے جواب دیا جائے گا۔

ایرانی وزیرِ خارجہ نے کہا کہ خطے کے کسی ایک ملک میں بھی جنگ چھیڑنے کی صورت میں مجموعی امن کا قیام ممکن نہیں رہے گا۔ عباس عراقچی نے زور دے کر کہا کہ واشنگٹن یا تل ابیب کے ساتھ دوبارہ جنگ چھڑنے کی صورت میں بھی ایران کے بنیادی موقف میں کوئی تبدیلی نہیں آئے گی۔ دوسری جانب، ایرانی پارلیمنٹ کے اسپیکر محمد باقر قالیباف نے بھی امریکا اور اس کے اتحادیوں کو خبردار کیا ہے کہ اگر ایران کی علاقائی سالمیت کی خلاف ورزی کی گئی تو ایسا تباہ کن جواب دیا جائے گا جس کا تصور بھی نہیں کیا جا سکتا۔ قالیباف نے کہا کہ ایران ایک آزاد اور طاقتور علاقائی قوت بن چکا ہے، جس کے باعث غیر ملکی طاقتیں اس کے مستقبل کا فیصلہ نہیں کر سکتیں۔ انہوں نے امریکا پر زور دیا کہ وہ اپنی تسلط پسندانہ پالیسیاں تبدیل کرے، دھمکیاں دینا بند کرے اور اپنے معاہدوں کی پاسداری کرے۔

اس سے قبل، ایرانی وزارتِ خارجہ کے ترجمان اسماعیل بقائی نے بھی جرمن نشریاتی ادارے کو انٹرویو دیتے ہوئے کہا تھا کہ ایرانی عوام کو امریکا کی نیت پر بالکل اعتبار نہیں ہے، اس لیے ہم دفاع کے لیے ہمہ وقت تیار ہیں۔ اسماعیل بقائی کے مطابق، ایران نے کبھی بھی سفارت کاری اور مذاکرات کا راستہ نہیں روکا اور ثالثوں کے ذریعے پیغامات کی آمد و رفت جاری ہے، تاہم امریکا سفارت کاری کے نام پر کامل تسلیم و رضا اور “سرنڈر” چاہتا ہے، جسے کوئی بھی ایرانی تسلیم نہیں کرے گا۔ انہوں نے مزید یاد دہانی کرائی کہ ایک سال سے بھی کم عرصے میں مذاکراتی عمل کے دوران ایران پر دو پرتشدد حملے ثابت کرتے ہیں کہ واشنگٹن امن کے لیے سنجیدہ نہیں ہے۔