روس کے بین الاقوامی اقتصادی فورم 2026ء کے سفیر کے عہدے پر پاکستانی شخصیت کی تقرری

روس کے تیسرے بین الاقوامی تاوریدا سرمایہ کاری و اقتصادی فورم (TIEF-2026) کے سفیر کے اہم عہدے پر پاکستانی شخصیت راجہ قدیر احمد کو مقرر کر دیا گیا ہے۔

خیرسون ریجن کے گورنر کے مشیر اور ‘فاؤنڈیشن برائے مستقبل کی ترقی’ کے ڈائریکٹر آر ایف سیرتلانوف نے ان کی تقرری کا باضابطہ حکم نامہ جاری کیا، جو 7 اکتوبر 2026ء سے مؤثر العمل ہے۔ باضابطہ حکم نامے کے مطابق، راجہ قدیر احمد بین الاقوامی تقریبات اور عالمی مذاکرات میں اس اقتصادی فورم کی نمائندگی کریں گے، جبکہ مختلف ممالک کے ممتاز کاروباری وفود، ماہرین اور اہم شخصیات کو فورم میں شرکت کی دعوت دیں گے۔

اس سال تاوریدا فورم کا مرکزی موضوع ‘تعلیم اور افرادی قوت: انسانی سرمائے میں سرمایہ کاری’ مقرر کیا گیا ہے، جس میں تعلیم، مصنوعی ذہانت (AI)، پیشہ ورانہ تربیت، سرمایہ کاری اور بین الاقوامی تجارتی تعاون کے موضوعات پر سیر حاصل مباحثے ہوں گے۔ فورم کی دستاویزات کے مطابق، 50 سے زائد ممالک کے نمائندوں کی شرکت متوقع ہے، جہاں یونیورسٹیوں اور عالمی کاروباری اداروں کے درمیان براہِ راست ملاقاتوں، مشترکہ منصوبوں اور اربوں روپے کے سرمایہ کاری معاہدوں کی توثیق کی جائے گی۔